នាព្រឹកថ្ងៃទី១ ខែតុលា ឆ្នាំ២០២៥ SME Bank និងសមាគមសហគ្រិនស្ត្រីកម្ពុជា បានធ្វើពិធីចុះហត្ថលេខាលើអនុស្សរណៈនៃការយោគយល់គ្នា ក្រោមអធិបតីភាព លោក ជា សុភ័ក្ត អគ្គនាយក នៃ SME Bank, លោកជំទាវ ចាន់ ភារី ប្រធានសមាគមសហគ្រិនស្ត្រីកម្ពុជា និងថ្នាក់ដឹកនាំជាន់ខ្ពស់ជាច្រើនរូបទៀត។
គួរបញ្ជាក់ផងដែរថា អនុស្សរណៈនៃការយោគយល់គ្នានេះ ត្រូវបានធ្វើឡើងលើកទី ១ កាលពីថ្ងៃទី ៩ ខែកញ្ញា ឆ្នាំ២០២២ រហូតដល់ថ្ងៃទី ៩ ខែកញ្ញា ឆ្នាំ២០២៥។ SME Bank និងសមាគមសហគ្រិនស្រ្តីកម្ពុជា បានព្រមព្រៀងរៀបចំអនុស្សរណៈនៃការយោគយល់គ្នានេះសារជាថ្មីម្តងទៀត ក្នុងគោលបំណងលើកកម្ពស់ លទ្ធភាពទទួលបានឥណទាន និងជំរុញវឌ្ឍនភាពធុរកិច្ច សម្រាប់សហគ្រិនស្រ្តីក្នុងវិស័យសហគ្រាសធុនតូច និងមធ្យម ឲ្យកាន់តែល្អប្រសើរ ដើម្បីកំណើនសេដ្ឋកិច្ច និងការអភិវឌ្ឍនៅកម្ពុជា។
តាមរយៈអនុស្សរណៈ នៃការយោគយល់គ្នានេះ សហគ្រិនស្រ្តីដែលជាសមាជិក នៃសមាគមសហគ្រិនស្រ្តីកម្ពុជា អាចស្នើសុំគម្រោងឥណទានអាជីវកម្ម ប្រកបដោយលក្ខខណ្ឌអនុគ្រោះ ពី SME Bank ដើម្បីអភិវឌ្ឍ និងពង្រីកអាជីវកម្មរបស់ខ្លួន។
