រាជធានីភ្នំពេញ, នារសៀលថ្ងៃអង្គារ ទី១៩ ខែឧសភា ឆ្នាំ២០២៦, ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល, ឯកឧត្តម ទេព ភិយ្យោរិន្ទ្រ សមាជិកក្រុមប្រឹក្សាភិបាល និងថ្នាក់ដឹកនាំ នៃធនាគារ SME បានទទួលជួបពិភាក្សាការងារជាមួយ លោកស្រី KIMURA Hidemi ប្រធាន នៃវិទ្យាស្ថានស្រាវជ្រាវគោលនយោបាយ នៃក្រសួងហិរញ្ញវត្ថុជប៉ុន និងសហការី។
ជំនួបពិភាក្សានេះ ត្រូវបានរៀបចំឡើងដើម្បីស្វែងយល់ពីការអនុវត្តកន្លងមក និងបន្តចុះកិច្ចសហប្រតិបត្តិការបច្ចេកទេស ដំណាក់កាលទី ២ ដែលមានសុពលភាពរយៈពេល ២ឆ្នាំ (ចាប់ពីខែមេសា ឆ្នាំ២០២៦ ដល់ខែមេសា ឆ្នាំ២០២៨) ក្នុងគោលដៅរួមចំណែកជំរុញការផ្តល់ឥណទានជូនដល់សហគ្រាសធុនតូច និងមធ្យមនៅកម្ពុជា ឱ្យកាន់តែរីកចម្រើន និងប្រកបដោយបរិយាបន្ន។ តាមរយៈការវិនិយោគលើធនធានមនុស្ស និងកិច្ចសហការជាមួយដៃគូអន្តរជាតិពីប្រទេសជប៉ុន ធនាគារ SME រំពឹងថានឹងអាចបម្រើសេវាកម្មហិរញ្ញវត្ថុជូនដល់ម្ចាស់សហគ្រាសនៅកម្ពុជាឱ្យកាន់តែរហ័ស គួរឱ្យទុកចិត្ត និងចំគោលដៅ ដើម្បីរួមចំណែកជំរុញកំណើនសេដ្ឋកិច្ចជាតិឱ្យកាន់តែរឹងមាំ។
តាមរយៈអនុស្សរណៈនៃកិច្ចសហប្រតិបត្តិការនេះ ភាគីជប៉ុនបានរៀបចំវគ្គបណ្តុះបណ្តាលជូនដល់ ធនាគារ SME សុរបចំនួន ៤ វគ្គ ដែលផ្តោតលើប្រធានបទសំខាន់ៗផ្សេងគ្នា ក្នុងគោលបំណងពង្រឹង និងលើកកម្ពស់សមត្ថភាពជូនដល់ថ្នាក់ដឹកនាំ ព្រមទាំងបុគ្គលិករបស់ ធនាគារ SME ឱ្យកាន់តែមានប្រសិទ្ធភាពខ្ពស់។
នាឱកាសនោះដែរ ឯកឧត្តមបណ្ឌិតសភាចារ្យ ផាន់ ផល្លា បានប្រគល់ជូននូវ វត្ថុអនុស្សាវរីយ៍ដែលជាផលិតផលក្នុងស្រុក កែច្នៃដោយ សិប្បករខ្មែរ ជូនដល់ភាគីជប៉ុន។
