នាថ្ងៃទី២៥ ខែកុម្ភៈ ឆ្នាំ២០២៣ ធនាគារ SME តំណាងដោយ លោកបណ្ឌិត លឹម អូន ជាអគ្គនាយក បានអញ្ជើញចូលរួមក្នុង “ពិធីសំណេះសំណាល និងពិសារអាហារសាមគ្គីជាមួយសហគ្រិនវ័យក្មេង” ក្រោមអធិបតីដ៏ខ្ពង់ខ្ពស់របស់ ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងមានការចូលរួមពីសំណាងភ្ញៀវកិត្តិយសជាង ៦០០នាក់ មកពីតំណាងស្ថាប័នជាច្រើនរួមមាន ក្រសួង-ស្ថាប័ន សមាគមសហគ្រិនវ័យក្មេង សមាគមសហគ្រិនស្រ្តី សហគ្រិន ម្ចាស់ធុរកិច្ច និងភាគីពាក់ពន្ធក្នុងប្រព័ន្ធអេកូឡូស៊ីនៃសហគ្រិនភាព។
កម្មវិធីនេះប្រារព្ធឡើងក្នុងគោលបំណងកសាង និងពង្រឹងប្រព័ន្ធអេកូឡូស៊ីនៃសហគ្រិនភាព ដោយផ្តល់នូវបរិយាកាសអំណោយផលក្នុងការបង្កើត និងបង្កើនទំនាក់ទំនង ការចែករំលែកចំណេះដឹង និងការផ្លាស់ប្តូរបទពិសោធន៍រវាងភ្ញៀវកិត្តិយសទាំងអស់នៃកម្មវិធី។
ធនាគារ SME ពិតជាមានសេចក្តីសោមនស្សដែលបានចូលរួមឧបត្ថម្ភក្នុងកម្មវិធីនេះ ដើម្បីអាចឱ្យសហគ្រិន ម្ចាស់ធុរកិច្ច ក៏ដូចជាភ្ញៀវកិត្តិយសទាំងអស់ទទួលបានចំណេះដឹងបន្ថែមអំពីសហគ្រិនភាព និងគោលនយោបាយនានារបស់រាជរដ្ឋាភិបាល ចំណេះដឹងក្នុងការចាប់ផ្តើម និងពង្រីកអាជីវកម្ម និងការទទួលបានឱកាសក្នុងការបង្កើនបណ្តាញទំនាក់ទំនងក្នុងប្រព័ន្ធអេកូឡូស៊ីសហគ្រិនភាព។
