រាជធានីភ្នំពេញ៖ នាថ្ងៃទី៣១ ខែតុលា ឆ្នាំ២០២៦ ធនាគារ SME មានកិត្តិយសចូលរួមឧបត្ថម្ភវេទិកាស្តីពី “Saharka Cyber Safety Summit 2026” ដែលរៀបចំឡើងដោយសាលា អេយូភីភី ឡៃហ្គឺ លីឌឺហ្សីប អាកាឌឺមី (AUPP Liger Leadership Academy) ក្នុងគោលបំណងលើកកម្ពស់ការយល់ដឹងអំពីសុវត្ថិភាពតាមប្រព័ន្ធអ៊ីនធឺណិត និងពង្រឹងចំណេះដឹងផ្នែកបច្ចេកវិទ្យាឌីជីថលក្នុងចំណោមយុវជនកម្ពុជា។
ក្នុងឱកាសនេះ តំណាងធនាគារ SME ក៏បានចូលរួមជាវាគ្មិនក្នុងកិច្ចពិភាក្សា ដើម្បីចែករំលែកទស្សនៈ និងបទពិសោធន៍ពាក់ព័ន្ធនឹងសុវត្ថិភាពឌីជីថល ការប្រើប្រាស់បច្ចេកវិទ្យាដោយការទទួលខុសត្រូវ និងសារៈសំខាន់នៃការយល់ដឹងអំពីហានិភ័យតាមប្រព័ន្ធអ៊ីនធឺណិត ជាពិសេសក្នុងបរិបទសេវាហិរញ្ញវត្ថុឌីជីថល។
ការចូលរួមនេះឆ្លុះបញ្ចាំងពីការប្តេជ្ញាចិត្តរបស់ធនាគារ SME ក្នុងការចូលរួមលើកកម្ពស់ចំណេះដឹងផ្នែកហិរញ្ញវត្ថុ និងឌីជីថល ព្រមទាំងជំរុញឱ្យយុវជនកម្ពុជាមានសមត្ថភាពប្រើប្រាស់បច្ចេកវិទ្យាប្រកបដោយសុវត្ថិភាព ការប្រុងប្រយ័ត្ន និងការទទួលខុសត្រូវ។
