ភ្នំពេញ៖ រសៀលថ្ងៃទី១ ខែកក្កដា ឆ្នាំ២០២៦ – ធនាគារអភិវឌ្ឍន៍អាស៊ី (ADB) សហការជាមួយធនាគារ SME បានរៀបចំពិធីប្រកាសដាក់ដំណើរការជាផ្លូវការនូវ “មូលនិធិបង្វិលសម្រាប់ប្រសិទ្ធភាពថាមពល (EERF)” ក្រោមអធិបតីភាពរបស់ ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាភិបាល នៃធនាគារ SME, ឯកឧត្តមបណ្ឌិត ទី នរិន្ទ រដ្ឋលេខាធិការ ក្រសួងរ៉ែ និងថាមពល និងមានការចូលរួមពី តំណាងធនាគារអភិវឌ្ឍន៍អាស៊ី ស្ថានទូតអង់គ្លេសប្រចាំកម្ពុជា, ស្ថាប័នហិរញ្ញវត្ថុចូលរួម, ដៃគូអភិវឌ្ឍន៍ និងវិស័យឯកជន។
មូលនិធិបង្វិលនេះគ្រោងទុនសរុបចំនួន ២០ លានដុល្លារអាម៉េរិក សម្រាប់បញេញឥណទាន និង ២,៥ លានដុល្លារអាម៉េរិក សម្រាប់ធានាឥណទាន។ ជារួម មូលនិធិបង្វិលសម្រាប់ប្រសិទ្ធភាពថាមពល មានគោលបំណងជំរុញ និងគាំទ្រលទ្ធភាពទទួលបានឥណទានរបស់ហគ្រាសធុនតូច និងមធ្យម សម្រាប់ការវិនិយោគលើបច្ចេកវិទ្យា និងឧបករណ៍ ដែលបង្កើនប្រសិទ្ធភាពប្រើប្រាស់ថាមពលរបស់សហគ្រាស ដែលរំពឹងថានឹងរួមចំណែកសំខាន់ដល់ការបង្កើនដល់ផលិតភាពផលិតកម្ម។ ការបញ្ចេញឥណទានក្រោមមូលនិធិនេះ នឹងត្រូវធ្វើឡើងដោយ ធនាគារ CIMB និង ធនាគារ FTB ក្នុងនាមជាគ្រឹះស្ថានហិរញ្ញវត្ថុចូលរួម និងក្រោមការគ្រប់គ្រងរបស់ធនាគារ SME ក្នុងនាមជាស្ថាប័នអនុវត្ត។
មូលនិធិនេះគ្រោងផ្តល់ជូនសហគ្រាសធុនតូច និងមធ្យម ដែលមានលក្ខណៈសម្បត្តិគ្រប់គ្រាន់ ជាមួយនឹងលក្ខខណ្ឌឥណទានមួយចំនួន រួមមាន ផ្តល់ជូនក្នុងអត្រាការប្រាក់ខ្ពស់បំផុតត្រឹម ៥,៥% ក្នុង១ឆ្នាំ, រយៈពេលសងត្រឡប់ ១០ឆ្នាំ និង ប្រើប្រាស់ជាទុនវិនិយោគលើឧបករណ៍/បរិក្ខារបង្កើនប្រសិទ្ធភាពថាមពល។ បន្ថែមលើនេះ មូលនិធិលើកទឹកចិត្តដល់សហគ្រាសដែលមានម្ចាស់ជាស្ត្រី ឬដឹកនាំដោយស្ត្រី ដោយគ្រោងបញ្ចេញឥណទានឱ្យបានយ៉ាងហោច ៣០% នៃទំហំឥណទានសរុប ព្រមទាំងតម្រូវឱ្យឆ្លើយតបនឹងគោលការណ៍ការពារផលប៉ះពាល់សង្គម និងបរិស្ថាន។
