រាជធានីភ្នំពេញ៖ នាថ្ងៃទី២៧ ខែតុលា ឆ្នាំ២០២៦ ធនាគារ SME មានកិត្តិយសចូលរួមជាវាគ្មិនកិត្តិយសក្នុង «វេទិកាថ្នាក់ជាតិ ស្តីពីហិរញ្ញប្បទានសម្រាប់សហគ្រាសធុនមីក្រូ តូច និងមធ្យម លើកទី១ ឆ្នាំ២០២៦» ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» នៅមជ្ឈមណ្ឌលសន្និបាត និងពិព័រណ៍កោះពេជ្រ។

ក្នុងឱកាសនេះ តំណាងធនាគារ SME បានធ្វើបទបង្ហាញអំពីគម្រោងហិរញ្ញប្បទានរបស់ធនាគារ ដោយផ្តោតលើជម្រើសហិរញ្ញប្បទាន និងលទ្ធភាពទទួលបានឥណទានសម្រាប់សហគ្រាសក្នុងវិស័យផលិតកម្ម និងកែច្នៃក្នុងស្រុក ព្រមទាំងផ្តល់ព័ត៌មាន និងការណែនាំដល់ម្ចាស់អាជីវកម្មអំពីការត្រៀមលក្ខណៈស្នើសុំឥណទាន ដើម្បីគាំទ្រដល់ការអភិវឌ្ឍ និងពង្រីកអាជីវកម្ម ព្រមទាំងបង្កើនសមត្ថភាពប្រកួតប្រជែង។

តាមរយៈការចូលរួមនេះ ធនាគារ SME ប្តេជ្ញាបន្តបំពេញតួនាទីជាធនាគារគោលនយោបាយរបស់រដ្ឋ ក្នុងការគាំទ្រសហគ្រាសធុនមីក្រូ តូច និងមធ្យម ជាពិសេសក្នុងវិស័យផលិតកម្ម និងកែច្នៃក្នុងស្រុក ដើម្បីជំរុញការប្រើប្រាស់វត្ថុធាតុដើមក្នុងស្រុក បង្កើនតម្លៃបន្ថែមដល់ផលិតផលខ្មែរ និងរួមចំណែកដល់ការអភិវឌ្ឍសេដ្ឋកិច្ចជាតិប្រកបដោយចីរភាព។