សិក្ខាសាលានេះត្រូវបានរៀបចំឡើងរយៈពីរថ្ងៃ ១៩-២០ ខែឧសភា ឆ្នាំ២០២៦ ដោយសហការរវាង ធនាគារ SME និងអង្គភាពអាជីវកម្មខ្នាតតូច នៃសាជីវកម្មហិរញ្ញវត្ថុជប៉ុន ក្រោមការគាំទ្រពី វិទ្យាស្ថានស្រាវជ្រាវគោលនយោបាយ នៃក្រសួងហិរញ្ញវត្ថុជប៉ុន ក្នុងគោលបំណងចែករំលែកចំណេះដឹង កសាង និងពង្រឹងសមត្ថភាពជូនដល់ថ្នាក់ដឹកនាំ និងបុគ្គលិករបស់ធនាគារ SME លើការវិភាគឥណទាន ព្រមទាំងគំរូនៃការវាយតម្លៃឥណទាន។ សិក្ខាសាលានេះមានការចូលរួមពីថ្នាក់ដឹកនាំ និងបុគ្គលិករបស់ ធនាគារ SME ប្រមាណ ៤០ នាក់ ដែលធ្វើការពាក់ព័ន្ធផ្ទាល់ជាមួយនឹងដំណើរការនៃការបញ្ចេញឥណទាន។
លោក ជា សុភ័ក្ត បានវាយតម្លៃខ្ពស់ចំពោះសិក្ខាកាមដែលបានចូលរួមយ៉ាងសកម្ម ក្រេបជញ្ជក់ចំណេះដឹង និងបទពិសោធន៍ ដែលត្រូវបានចែករំលែកដោយគ្រូឧទេសនាមពីអង្គភាពអាជីវកម្មខ្នាតតូច និងសាជីវកម្មហិរញ្ញវត្ថុជប៉ុន (JFC-Micro) លើប្រធានបទសំខាន់ៗ រួមមាន ការវិភាគរំហូរសាច់ប្រាក់ (Cash flow analysis), ការវិភាគការវិនិយោគមូលធន (Capital Investment Analysis) និងគំរូវាយតម្លៃពិន្ទុឥណទាន (Credit Scoring Models)។ ជាមួយគ្នានេះ លោកបានថ្លែងអំណរគុណយ៉ាងជ្រាលជ្រៅជូនដល់គណៈប្រតិភូ និងក្រុមការងារភាគីជប៉ុន ដែលបានចំណាយពេលបណ្តុះបណ្តាលដល់សិក្ខាកាមរយៈពេលពីរថ្ងៃកន្លងមកនេះ។
