អំពីយើងខ្ញុំ

តាងនាមក្រុមប្រឹក្សាភិបាល នៃ “SME Bank” ខ្ញុំមានកិត្តិយស និងសូមអនុញ្ញាតបង្ហាញជូននូវរបាយការណ៍ប្រចាំឆ្នាំ ដែលសង្ខេបពីលទ្ធផលការងាររបស់ធនាគារ ក្នុងឆ្នាំ២០២៤។ លទ្ធផលនេះឆ្លុះបញ្ចាំងពីការប្តេជ្ញាចិត្តដ៏មុតមាំ និងការខិតខំប្រឹងប្រែងរបស់ “SME Bank” ក្នុងនាមជាធនាគារគោលនយោបាយរបស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍនៃសហគ្រាសធុនតូច និងមធ្យម នៅកម្ពុជា ដែលត្រូវបានទទួលស្គាល់ថាជាមូលដ្ឋានគ្រឹះនៃសេដ្ឋកិច្ចកម្ពុជា។

ជាការពិតណាស់ ក្នុងឆ្នាំ២០២៤ កន្លងទៅ, ស្ថានភាពសេដ្ឋកិច្ចសកលនៅតែបន្តបោះជំហានទៅមុខក្នុងគន្លងនៃការងើបឡើងវិញ ប៉ុន្តែបន្តយាយីដោយបញ្ហាប្រឈមជាច្រើន និងហ៊ុមព័ទ្ធដោយភាពមិនប្រាកដប្រជាខ្ពស់ រួមមាន (១). បច្ច័យអវិជ្ជមាន បណ្តាលមកពីការអូសបន្លាយនៃសង្គ្រាមរុស្ស៊ី-អ៊ុយក្រែន, សង្គ្រាមអ៊ីស្រាអែល-ហាម៉ាស់, ការកើនឡើងនូវគោលនយោបាយគាំពារនិយម ព្រមទាំងការបែកខ្ញែកទីតាំង ភូមិសាស្ដ្រសេដ្ឋកិច្ចនយោបាយ ដែលមិនត្រឹមតែបាននាំមកនូវផលរំខានដល់ខ្សែច្រវាក់ផ្គត់ផ្គង់ និងនាំឱ្យមានការកើនឡើងថ្លៃទំនិញ, ប៉ុន្តែ ថែមទាំងបង្កើត និងបង្កើនរបាំងមកលើពាណិជ្ជកម្មអន្តរជាតិ, រំហូរទុនវិនិយោគ, រំហូរបច្ចេកវិទ្យា, រំហូរមនុស្ស និងប្រព័ន្ធទូទាត់អន្តរជាតិ និង (២). ការកើតឡើងជាញឹកញាប់នៃគ្រោះធម្មជាតិក្នុងកម្រិតធ្ងន់ធ្ងរទូទាំងសកលលោក បណ្តាលមកពីការប្រែប្រួលអាកាសធាតុ ដែលបានជះឥទ្ធិពលអវិជ្ជមានមកលើដំណើរនៃការអភិវឌ្ឍសង្គមសេដ្ឋកិច្ច ក៏ដូចជាសន្ដិសុខស្បៀងអាហារ។ ជាលទ្ធផល, សេដ្ឋកិច្ចសកលឆ្នាំ២០២៤ ត្រូវបានប៉ាន់ប្រមាណថាបន្តមានកំណើន ៣,២% ដែលឆ្លុះបញ្ចាំងពីការបន្តងើបឡើងវិញសន្សឹមៗនៃតម្រូវការប្រើប្រាស់ឯកជន, រំហូរវិនិយោគ និងពាណិជ្ជកម្មអន្តរជាតិ។

ស្ថិតក្នុងបរិការណ៍នេះ, សេដ្ឋកិច្ចកម្ពុជា ត្រូវបានវាយតម្លៃថា នៅតែបន្តមានកំណើនល្អ ក្នុងរង្វង់ ៦,០% នាឆ្នាំ២០២៤ ដោយសារ (១). ការត្រឡប់ទៅរកភាពល្អប្រសើរឡើងវិញនៃសេដ្ឋកិច្ចសកល ជាពិសេស ប្រទេសដៃគូពាណិជ្ជកម្មកម្ពុជា និង (២). លទ្ធផលនៃការកែទម្រង់ស៊ីជម្រៅក្នុងរយៈពេលប៉ុន្មានឆ្នាំកន្លងមក, ការដាក់ចេញគោលនយោបាយ និងវិធានការគោលនយោបាយជំរុញកំណើន ដែលបានចង្អុលបង្ហាញ និងសង្កត់ធ្ងន់បន្ថែមក្នុងក្របខណ្ឌនៃ «យុទ្ធសាស្ត្របញ្ចកោណ-ដំណាក់កាល ទី១» បានហុចផលជាផ្លែផ្កា និងកាលានុវត្តភាពជាសារវន្តដល់ប្រព័ន្ធអេកូឡូស៊ីធុរកិច្ច និងពាណិជ្ជកម្ម ដែលជាមូលដ្ឋានចម្បងសម្រាប់ជំរុញជវភាពសេដ្ឋកិច្ចជាតិ។

ទោះបីសេដ្ឋកិច្ចពិភពលោក រួមទាំងកម្ពុជា បន្តស្ថិតក្នុងភាពមិនប្រាកដប្រជា និងរងឥទ្ធិពលពីបញ្ហា សកលនានាយ៉ាងណាក៏ដោយ, វិស័យហិរញ្ញវត្ថុកម្ពុជានៅបន្តមានស្ថិរភាព និងរឹងមាំ។ ការណ៍នេះឆ្លុះបញ្ចាំង តាមរយៈ ការរក្សាបាននូវកម្រិតខ្ពស់នៃសូចនាករម៉ាក្រូប្រុងប្រយ័ត្នសំខាន់ៗ រួមមាន អនុបាតសន្ទនីយភាពរបស់ធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ និងអនុបាតសាធនភាព សម្រាប់ធនាគារពាណិជ្ជ និងមីក្រូហិរញ្ញវត្ថុ បើទោះបីជា ឥណទានមិនដំណើរការ (NPLs) ទាំងធនាគារពាណិជ្ជ និងមីក្រូហិរញ្ញវត្ថុ មានការកើនឡើង ប៉ុន្តែក្នុងកម្រិតអាចគ្រប់គ្រងបាន។

ក្នុងបរិយាកាសនេះ, “SME Bank” បានបន្តបេសកកម្មយ៉ាងសកម្មក្នុងការចូលរួមជំរុញការរីកចម្រើនរបស់ សហគ្រាសធុនតូច និងមធ្យម នៅកម្ពុជា តាមរយៈការផ្តល់ឥណទានប្រកបដោយលក្ខខណ្ឌអនុគ្រោះ។ គិតត្រឹមដំណាច់ឆ្នាំ២០២៤ នេះ “SME Bank” បានផ្តល់ឥណទាន តាមរយៈគម្រោងផ្តល់ឥណទានដោយផ្ទាល់បានចំនួន ៤៥៧ សហគ្រាស សមមូលនឹងទឹកប្រាក់សរុបចំនួន ១២២.៤ លានដុល្លារអាម៉េរិក ស្មើនឹងកំណើន ៤២% ធៀបនឹងឆ្នាំ២០២៣។ ក្នុងនោះ ឥណទានផ្តល់ជូនដល់វិស័យអាទិភាព (កម្មន្តសាល, ការដំឡើង, កែច្នៃ និងកសិ-ឧស្សាហកម្ម) ភ្ជាប់នឹងលក្ខខណ្ឌអនុគ្រោះខ្ពស់ សម្រេចបានប្រមាណ ៦១ ដុល្លារអាម៉េរិក ត្រូវនឹង ៥០% នៃទំហំឥណទានដោយផ្ទាល់ ខណៈទំហំឥណទានផ្តល់ជូនសហគ្រិនស្ត្រី ដែលក៏ជាអាទិភាពដែរនោះសម្រេចបានប្រមាណ ៥២.២ ស្មើនឹង ៤៣% នៃទំហំឥណទានដោយផ្ទាល់។

“SME Bank” ប្តេជ្ញាចិត្តយ៉ាងមុតមាំ ក្នុងការបន្តគាំទ្រសហគ្រាសធុនតូច និងមធ្យម ស្របតាមចក្ខុវិស័យ និងបេសសកម្ម ដែលបានដាក់ចេញ តាមរយៈការបន្តកែលម្អ និងបន្ធូរបន្ថយលក្ខខណ្ឌឥណទាន, បង្កើតផលិតផលថ្មីៗ និងជំរុញប្រសិទ្ធភាពនៃដំណើរការបញ្ចេញឥណទាន។ ចុងក្រោយ ខ្ញុំសូមថ្លែងអំណរគុណ យ៉ាងស្មោះស្ម័គ្រចំពោះអតិថិជនទាំងអស់ ដែលតែងផ្តល់ការជឿទុកចិត្ត និងចាត់ទុកធនាគារសហគ្រាសធុនតូច និងមធ្យម ជាដៃគូដ៏ស្មោះត្រង់ គាំទ្រដល់ការចាប់ផ្តើម និងការពង្រីកអាជីវកម្មនាពេលកន្លងមក។ ជាការតបស្នងដល់ទំនុកចិត្ត និងភក្តីភាព យើងខ្ញុំទាំងអស់គ្នាក្នុងនាមក្រុមប្រឹក្សាភិបាល គណៈគ្រប់គ្រង និងបុគ្គលិកទាំងអស់ នៃ “SME Bank” ប្តេជ្ញាបន្តប្រឹងប្រែងឆ្លើយតបនឹងតម្រូវការរបស់សហគ្រាសធុនតូច និងមធ្យម ទាំងអស់ គាំទ្រដល់វឌ្ឍនភាពនៃអាជីវកម្មក្នុងគ្រប់វិស័យ ជាពិសេស វិស័យអាទិភាព សំដៅរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ឱ្យរីកចម្រើនជាលំដាប់។