អំពីយើងខ្ញុំ

តាងនាមក្រុមប្រឹក្សាភិបាល នៃធនាគារសហគ្រាសធុនតូច និង មធ្យម កម្ពុជា ម.ក (ធ.ស.ក) ខ្ញុំមានកិត្តិយសសូមបង្ហាញជូន នូវរបាយការណ៍ប្រចាំឆ្នាំ ដែលសង្ខេបអំពីលទ្ធផលការងារផ្តល់ហិរញ្ញប្បទានដល់សហគ្រាសធុនតូច និងមធ្យម នៅកម្ពុជា ក្នុងឆ្នាំ២០២៣។ លទ្ធផលនេះ ជាសក្ខីភាពនៃការប្តេជ្ញាចិត្ត និងការខិតខំរបស់ធ.ស.ក ក្នុងនាមធនាគារគោលនយោបាយរបស់ រាជរដ្ឋាភិបាលកម្ពុជា គាំទ្រការអភិវឌ្ឍសហគ្រាសធុនតូច និង មធ្យម ដែលត្រូវបានរំពឹងទុកថា នឹងមានតួនាទីកាន់តែសំខាន់ រួមចំណែកជំរុញសន្ទុះកំណើនសេដ្ឋកិច្ចឱ្យកាន់តែរឹងមាំ និងធន់នឹងវិបត្តិ។

ជាការពិត, ស្ថានភាពសេដ្ឋកិច្ចសកលបាន និងកំពុងបន្តប្រឈមនឹងហានិភ័យ និងភាពមិនប្រាកដប្រជាខ្ពស់ ដែលបង្កឡើង ដោយឥទ្ធិពលពីវិបត្តិ និងព្រឹត្តិការណ៍ធំៗ មានជាអាទិ៍ ស្លាកស្នាម នៃវិបត្តិជំងឺកូវីដ-១៩, សង្គ្រាមរវាងរុស្ស៊ី និងអ៊ុយក្រែន, និងការផ្ទុះឡើងនូវការប្រយុទ្ធរវាងអ៊ីស្រាអែល និងក្រុមហាម៉ាស់ នៅចុងឆ្នាំ២០២៣ ជាដើម។ បន្ថែមលើនេះ, ការបន្តរឹតបន្តឹង គោលនយោបាយរូបិយវត្ថុសកល ក៏បានបង្កផលប៉ះពាល់ អវិជ្ជមានមួយកម្រិតទៀត ដល់ចលនាសេដ្ឋកិច្ចសកល និងវិស័យសក្តានុពល រាប់ទាំងវិស័យហិរញ្ញវត្ថុ និងធនាគារ។ ជាលទ្ធផល កំណើនសេដ្ឋកិច្ចសកលក្នុងឆ្នាំ២០២៣ បានថមថយមកក្នុងរង្វង់ ៣,២% ស្របពេលដែលកំណើនសេដ្ឋកិច្ច កម្ពុជាសម្រេចបានប្រហាក់ប្រហែលនឹងឆ្នាំ២០២២ ពោលគឺ ក្នុងរង្វង់ ៥%។

ក្នុងបរិការណ៍នេះ, វិស័យហិរញ្ញវត្ថុនៅកម្ពុជា ដូចគ្នាទៅនឹង បណ្តាប្រទេសក្នុងតំបន់ បានជួបប្រទះនឹងឥទ្ធិពលអវិជ្ជមាន ដែលឆ្លុះបញ្ចាំងតាមរយៈការថមថយនៃកំណើនឥណទាន ពី ១៩% ក្នុងឆ្នាំ២០២២ មកត្រឹម ៤,៨% ក្នុងឆ្នាំ២០២៣ និងការកើនឡើងនៃអនុបាតឥណទានមិនដំណើរការដល់ ៥,៤% ក្នុង ឆ្នាំ២០២៣ ធៀបនឹង ៣,១% ក្នុងឆ្នាំ២០២២។ ទោះស្ថិតក្នុងស្ថានភាពពុំសូវអំណោយផលក្តី, ធនាគារសហគ្រាសធុនតូច និងមធ្យម កម្ពុជា បានពុះពារក្នុងការបន្តបេសកកម្មផ្តល់ ឥណទានដល់សហគ្រាសធុនតូច និងមធ្យម។ ជាក់ស្តែង គិត ត្រឹមឆ្នាំ២០២៣ ធនាគារបានចូលរួមផ្តល់ឥណទាន តាមរយៈ យន្តការឥណទានដោយផ្ទាល់ ទៅដល់អាជីវកម្ម គោលដៅ ចំនួន ៣៦៥ សហគ្រាស ស្មើនឹងទំហំទឹកប្រាក់សរុបប្រមាណ ៨៦,១៥ លានដុល្លារអាម៉េរិក កើនឡើង ប្រមាណ ៦០% ធៀបនឹងឆ្នាំ២០២២ ខណៈការផ្តល់ឥណទានតាមរយៈគម្រោងសហហិរញ្ញប្បទាន ដោយគ្រឹះស្ថានហិរញ្ញវត្ថុចូលរួម បានផ្តល់ការគាំទ្រដល់សហគ្រាសសរុបចំនួន ៣០៩៥ ស្មើនឹងទំហំទឹកប្រាក់សរុបប្រមាណជា ៣៩៤ លានដុល្លារអាម៉េរិក។

ឆ្លងកាត់ប្រតិបត្តិការនាប៉ុន្មានឆ្នាំចុងក្រោយនេះ, យើងសង្កេតឃើញថា បញ្ហាប្រឈមរបស់សហគ្រាសធុនតូច និង មធ្យម នៅមានច្រើន ស្មុគស្មាញ និងលើសពីតម្រូវការហិរញ្ញប្បទាន ដែលត្រូវការរួមចំណែកពីតួអង្គពាក់ព័ន្ធទាំង ស្ថាប័នសាធារណៈ, ដៃគូអភិរឌ្ឍន៍ និងជាពិសេស វិស័យឯកជនផ្ទាល់ រួមគ្នាដោះស្រាយក្នុងស្មារតីទទួលខុសត្រូវខ្ពស់ និង ប្រកបដោយភាពម្ចាស់ការ។ ក្នុងន័យនេះ ធនាគារសហគ្រាស ធុនតូច និងមធ្យម កម្ពុជា ប្តេជ្ញាបន្តខិតខំផ្តល់ការគាំទ្រដល់សហគ្រាសធុនតូច និងមធ្យម តាមរយៈការពង្រឹងសេវាឥណទាន ឱ្យកាន់តែមានប្រសិទ្ធភាព ពោលគឺ ផ្តល់ភាពទន់ភ្លន់ឱ្យបាន ច្រើនលើលក្ខខណ្ឌទទួលបានគណទាន, កាត់បន្ថយរយៈពេលបញ្ចេញឥណទានជូនអតិថិជន និងជាពិសេសផ្តល់ឥណទានឱ្យចំគោលដៅ ស្របតាមគោលនយោបាយអាទិភាព របស់រាជរដ្ឋាភិបាល ដែលបានគូសរំលេចក្នុងយុទ្ធសាស្ត្របញ្ចកោណ ដំណាក់កាលទី១។

ជាចុងក្រោយ ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះ អតិថិជនទាំងអស់ដែលផ្តល់ការជឿទុកចិត្ត និងតែងចាត់ទុកធនាគារសហគ្រាសធុនតូច និងមធ្យម ជាដៃគូដ៏ស្មោះត្រង់ គាំទ្រ ដល់ការចាប់ផ្តើម និងការពង្រីក អាជីវកម្មរបស់ខ្លួន នាពេលកន្លងមក។ ជាការតបស្នងចំពោះកាយវិការនេះ យើងខ្ញុំ ទាំងអស់គ្នាក្នុងនាមក្រុមប្រឹក្សាភិបាល គណៈគ្រប់គ្រង និង បុគ្គលិក ធ.ស.ភ ប្តេជ្ញាបន្តធ្វើជាដៃគូល្អ និងបន្តផ្តល់ឥណទាន ដល់សហគ្រាស ធុនតូច និងមធ្យម ទាំងអស់ ដែលមានតម្រូវការហិរញ្ញប្បទាន ដើម្បីគាំទ្រដល់ការរីកលូតលាស់នៃ អាជីវកម្ម សំដៅរួមចំណែកអភិវឌ្ឍសង្គម-សេដ្ឋកិច្ចកម្ពុជា។