អំពីយើងខ្ញុំ

ក្នុងឆ្នាំ២០២៥ សេដ្ឋកិច្ចកម្ពុជាបានទទួលរងនូវព្យុះកំបុត ត្បូងពីរ គឺ ទី១. ពន្ធគយបដិការរបស់សហរដ្ឋអាម៉េរិក និង ទី២. ភាពតានតឹងព្រំដែន កម្ពុជា-ថៃ រហូតឈានដល់ការប៉ះទង្គិចប្រដាប់អាវុធពីរលើកផ្ទួនៗ។ ទោះជាយ៉ាងនេះក្តី, ពន្ធគយបដិការពុំមានបច្ច័យអវិជ្ជមានធ្ងន់ធ្ងរ មកលើសេដ្ឋកិច្ចកម្ពុជានោះទេ។ ផ្ទុយទៅវិញ, ការបិទខ្ទប់ព្រំដែនគោកកម្ពុជា-ថៃ ដោយឯកតោភាគីរបស់ថៃ និងភាពតានតឹងជុំវិញបញ្ហាព្រំដែន បានបង្កផលប៉ះពាល់គួរ​ឱ្យ​កត់​សម្គាល់​មក​លើ សកម្មភាពសេដ្ឋកិច្ចកម្ពុជា មានជាអាទិ៍ សកម្មភាពផលិតកម្មថៃ បូកមួយ(Thailand+1), សកម្មភាពទេសចរណ៍ ដែលពឹងផ្អែកច្រកព្រំដែនកម្ពុជា-ថៃ, ការនាំចេញផលិតផល កសិកម្ម, រំហូរនៃប្រាក់បង្វែរឯកជន, សកម្មភាពដឹកជញ្ជូន និងវិស័យហិរញ្ញវត្ថុ។ ជាមួយគ្នានេះ, មានការលេចឡើងនូវនិន្នាការថ្មីៗ គួរឱ្យកត់សម្គាល់មួយចំនួន រួមមាន ការងាកមកគាំទ្រ និងប្រើប្រាស់ផលិតផលក្នុងស្រុក និងការបង្កើនសមត្ថភាព និងកម្លាំងផលិតកម្មក្នុងស្រុក, ការបង្វែរទិសដៅដឹកជញ្ជូន និងការផ្លាស់ប្តូរមធ្យោបាយដឹកជញ្ជូន, និងការធ្វើពិពិធកម្មនៃច្រវាក់តម្លៃពីទីផ្សារថៃ។

ដោយឡែក វិស័យហិរញ្ញវត្ថុ និងធនាគារ ហាក់បន្តជំហររឹងមាំជាមួយនឹងភាពធន់ បើទោះជា ឥណទាន បន្តមានកំណើនទាប ខណៈឥណទានមិនដំណើរការមានការកើនឡើងជាលំដាប់។ ជាក់ស្តែង ក្នុងឆ្នាំ២០២៥ ឥណទានដែលបានផ្តល់ដោយប្រព័ន្ធធនាគារមានកំណើនត្រឹម ៥,៤% ខណៈអនុបាតឥណទានមិនដំណើរការស្ថិតក្នុងកម្រិតខ្ពស់ ៨,៣% សម្រាប់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ និង ១៣,៥% សម្រាប់គ្រឹះស្ថានធនាគារ និងហិរញ្ញវត្ថុ មិនទទួលប្រាក់បញ្ញើ។ ទោះជាយ៉ាងនេះក្តី ស្ថានភាពដើមទុន និងសន្ទនីយភាពមានភាពរឹងមាំ ដោយអនុបាតភាពគ្រប់គ្រាន់នៃដើមទុនមានកម្រិត ២២% សម្រាប់គ្រឹះស្ថានធនាគារ និងហិរញ្ញវត្ថុ ទទួលប្រាក់បញ្ញើ និង ៣១,២% សម្រាប់គ្រឹះស្ថានធនាគារ និងហិរញ្ញវត្ថុមិនទទួលប្រាក់បញ្ញើ ដែលខ្ពស់ជាង កម្រិតបទប្បញ្ញត្តិ ១៥% ហើយអនុបាតសន្ទនីយភាពមានកម្រិត ១៧៩,៣% សម្រាប់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ ដែលខ្ពស់ជាងកម្រិតបទប្បញ្ញត្តិ ១០០%។

ប្រឈមនឹងស្ថានភាពទាំងសេដ្ឋកិច្ច និងហិរញ្ញវត្ថុ ដែលមិនសូវអំណោយផល និងប្រាកដប្រជា, ធនាគារ សហគ្រាសធុនតូច និងមធ្យម កម្ពុជា ម.ក (ធនាគារ SME) ដែលជាធនាគារគោលនយោបាយ បានបន្តរួមចំណែកយ៉ាងសកម្មក្នុងការផ្តល់ឥណទានដល់      សហគ្រាសធុនតូច និងមធ្យម ជាពិសេស ក្នុងវិស័យអាទិភាព ដែលតម្រង់ទិសតាមរយៈគោលនយោបាយជាតិសំខាន់ៗ រួមមាន យុទ្ធសាស្ត្របញ្ចកោណដំណាក់កាលទី១, កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុងបរិការណ៍សកល ដែលមានភាពមិនប្រាកដប្រជាខ្ពស់របស់រាជរដ្ឋាភិបាល នីតិកាល ទី ៧ នៃរដ្ឋសភា, កម្មវិធីជំរុញការកែលម្អបរិយាកាសធុរកិច្ច និងវិនិយោគនៅកម្ពុជា ឆ្នាំ២០២៥-២០២៨ និងគោលនយោបាយពាក់ព័ន្ធផ្សេងទៀត។ គិតត្រឹមដំណាច់ឆ្នាំ២០២៥ ធនាគារ SME បានបង្កើនសមតុល្យឥណទានដុលសរុបដល់ ២៣០ លានដុល្លារអាម៉េរិក ក្នុងនោះ សមតុល្យឥណទានដុលដោយផ្ទាល់មានប្រមាណ ១៦៥ លានដុល្លារអាម៉េរិក ដែលសមាមាត្រនឹងចំនួនសហគ្រាសសរុប ២៨៥០ ដែលសហគ្រិនស្ត្រីមាន ២៩%។

ក្នុងនាមក្រុមប្រឹក្សាភិបាល ធនាគារ SME, ខ្ញុំពិតជាមានមោទនភាព និងក្តីសោមនស្សដែលបានឃើញពីការរីកចម្រើនរបស់សហគ្រាសធុនតូច និងមធ្យម ជាពិសេសក្នុងវិស័យអាទិភាព ដែលកើតចេញពីការរួមចំណែករបស់ឥណទាន ពីធនាគារសហគ្រាសធុនតូច និងមធ្យម កម្ពុជា ក្នុងរយៈពេលចុងក្រោយនេះ។ ពិតណាស់ វឌ្ឍនភាពនេះស្តែងឱ្យឃើញពីជម្រើស និងវិធានការគោលនយោបាយដ៏ត្រឹមត្រូវ និងប្រកបដោយប្រសិទ្ធភាពរបស់រាជរដ្ឋាភិបាល និងការខិតខំប្រឹងប្រែងរបស់តួអង្គពាក់ព័ន្ធ ជាពិសេស សហគ្រាសធុនតូច និងមធ្យម សំដៅលើកកម្ពស់ភាពធន់ និងបរិយាប័ន្ននៃសេដ្ឋកិច្ចកម្ពុជា។ ទីបញ្ចប់ យើងខ្ញុំទាំងអស់គ្នា ក្នុងនាមក្រុមប្រឹក្សាភិបាល គណៈគ្រប់គ្រង និងបុគ្គលិក ធនាគារ SME ប្តេជ្ញាបន្តប្រឹងប្រែង និងឆ្លើយតបនឹងសំណូមពរ និងការចង់បានរបស់អតិថិជន ដើម្បីបង្កើនប្រសិទ្ធភាព ផ្តល់ឥណទាន ដែលជាចំណែកនៃការលើកកម្ពស់លទ្ធភាពទទួលបានហិរញ្ញប្បទានរបស់សហគ្រាសធុនតូច និងមធ្យម នៅកម្ពុជា។